Төрийн албаны стандартын төсөл боловсруулах үүрэг бүхий ажлын хэсгийн анхны хурал Төрийн албаны зөвлөлийн “Инновац” танхимд боллоо.

“Төрийн албаны тухай хууль анх 1994 онд батлагдахад стандартын тухай заалт орсон, түүнээс хойш 2002, 2008, 2017 онд батлагдсан шинэчилсэн найруулга, нэмэлт өөрчлөлтүүдэд ч дээрх нэр томъёо батлагдсаар ирсэн, гэвч төрийн албаны нэгдсэн стандартыг баталж, мөрдүүлэлгүй өнөөг хүрсэн” гэдгийг Засгийн газрын хүний нөөцийн газрын даргын албан үүргийг түр орлон гүйцэтгэгч С.Алтангэрэл Төрийн албаны стандартын талаар хийсэн танилцуулгадаа дурдав. Мөн Япон, БНСУ, Канад зэрэг улсын жишээ, туршлагаас дурдаж, Монгол Улсын төрийн албаны нэгдсэн, тогтвортой дүр төрхийг бүрдүүлсэн стандарт шаардлагатай байгааг онцолж, зарим стандартын төслийг танилцуулсан юм.

Стандарт, хэмжил зүйн газрын Стандартчилал, тохирлын үнэлгээний бодлогын газрын дарга Г.Тулгаа “Стандарт, түүнийг батлах үйл явц процессын талаар танилцуулга” хийлээ.

Хуралд Монгол Улсын Ерөнхийлөгчийн тамгын газар, Улсын Их Хурлын тамгын газар, Засгийн газрын хяналт хэрэгжүүлэх газар, Гадаад харилцааны яам, Хууль зүй дотоод хэргийн яам, Удирдлагын академи, Герман Монголын хамтарсан Ашигт малтмал, Технологийн их сургууль, Стандарт хэмжил зүйн газар, Нийслэлийн хөдөлмөр халамжийн газрын төлөөллөөс бүрдсэн ажлын хэсгийн гишүүд оролцов.