БНСУ -ын Хөдөлмөрийн дэд сайд Ли Сон Хи баасан гарагт болсон Засгийн газрын хуралдааны үеэр Солонгосын Хөдөлмөр эрхлэлтийн мэдээллийн албанаас гаргасан тайлангаас эш татан тайлбар хийсэн байна.
Тус тайланд БНСУ-ын хүн ам зүйн асуудал гүнзгийрч байгаа нь хөгшрөлт нэмэгдэж, төрөлт хурдацтай буурч байгаатай холбоотой бөгөөд энэ нь хөдөлмөрийн зах зээлд шууд нөлөөлнө гэдгийг онцолжээ. Хүүхэд асрах, эрүүл мэнд, халамж, мэдээлэл, харилцаа холбоо, шинжлэх ухаан технологи зэрэг янз бүрийн салбарын ажилчдын эрэлт нэмэгдэж, харин үйлдвэрлэлийн салбарт ажиллагсдын тоо буурахаар байгаа аж. Энэхүү дүн шинжилгээнд үндэслэн тус улс 2032 оны эцэс гэхэд эдийн засгийн өсөлтийн таамагтаа хүрэхийн тулд 894 мянган ажилчин нэмж авах шаардлагатай гэж тайланд дурджээ.
Хөдөлмөрийн насны хүн амын тоо буурч байгаатай холбогдуулан тус улсын Засгийн газар залуучууд, эмэгтэйчүүд, дунд болон өндөр насныхны хөдөлмөр эрхлэлтийг нэмэгдүүлэхэд чиглэсэн бодлого боловсруулна гэж Ли хэлэв. Тэрээр "Бид уян хатан ажлын хөтөлбөрүүдийг өргөжүүлж, хүүхэд асрах дэмжлэгийг нэмэгдүүлэхийн зэрэгцээ ажлын байраа өөрчлөхөд үзүүлэх дэмжлэгийг нэмэгдүүлэх болно. Богино хугацаанд бид зохих ур чадвартай ажилчдыг зохих албан тушаалд байрлуулахын тулд хүчин чармайлт гаргах болно” гэв. Мөн гадаад ажилчдад хөдөлмөр эрхлэх зөвшөөрөл олгоход дэмжлэг үзүүлж, тус улсад суурьшихад дэмжлэг үзүүлэхээ амласан байна.
Эх сурвалж: Кoreatimes
