“Чингис хаан” нисэх онгоцны буудалд өнөө өглөө хоёр хүн нэгнээ хутгалж гэмтээсэн хэрэг гарсан.  Үүнээс болж “Чингис хаан” нисэх онгоцны буудалд цагдаагийнхан хамгаалалт авч хол хорио тогтоосон. Одоо ч гэсэн хэрэг гарсан бие засах газрыг хамгаалалтад авсан хэвээр байна.
Энэ хэргийн талаар ЦЕГ-ын Хэвлэл мэдээллийн төвийн мэргэжилтэн, цагдаагийн дэд ахлагч Т.Жаргалсайханаас тодрууллаа.

-Оюутолгойн ажилчид нэгнийгээ хутгалсан хэрэг гарсан байна. Энэ хэргийг цагдаагийнхан шалгаж байгаа байх?
-Өнөө өглөө 09.20 цагт онгоцноос буусан “Оюутолгой” компанийн ажилтан Э-г мөн “Оюутолгой” компанид ажиллаж байсан Э гэгч хутгалсан хэрэг гарсан. Тэрээр, маргалдаж “намайг чи ажлаас халуулсан” хэмээн шалтаглаж хутгалсан байна билээ. Улмаар өөрийгөө хутгалж биедээ гэмтэл учруулсан. Одоо эмнэлэгт хүргэгдэн эмчлүүлж байна.
-Өс хонзонтой байсан байх нь ээ?
-Тийм ээ. Өс хонзонгийн сэдэлтээр хутгалсан байна.
-Тэд согтуу байсан юм уу?
-Согтууруулах ундаа хэрэглэсэн үедээ танхайрсан. Хэргийг шалгаж байна гэв.