Эрүүл мэндийн дэд сайд Ж.Амарсанаа өчигдөр  БНФУ-аас Монгол Улсад суугаа Онц Бөгөөд Бүрэн Эрхт Элчин Сайд ноён Ив Дэлүнэгийн хамтаар  Гэмтэл, согог судлалын үндэсний төвийн үйл ажиллагаатай танилцлаа. Тус төвд анх 1999 онд БНФУ-аас Европын Холбооны ТАСИС хөтөлбөрийн шугамаар төсөл хэрэгжүүлж, эмнэлгийн тоног төхөөрөмж нийлүүлэн, эмч мэргэжилтнүүдийг Францын эмнэлгүүдэд дадлагажуулж эхэлжээ.  Дэд сайд Ж.Амарсанаа Монгол, Францын эмч нарын багтай уулзаж, тэдний саналыг сонсож, харилцан ярилцав. Францын эмч нар  Монголын эрүүл мэнд, анагаах ухааны салбар маш их өөрчлөгдөн хөгжиж байгааг онцлон хэллээ.  Мөн Монголын эмч мэргэжилтнүүд ажлын байрандаа тогтвор суурьшилтай ажиллаж байдагт сэтгэл маш хангалуун байгаа илэрхийлэв.