ШУА-ийн Түүхийн хүрээлэнгийн эрдэмтэн, судлаачид  Хөвсгөл аймгийн Рашаант сумын Салхитын ам гэдэг газраас Хүннүгийн үеийн булш олжээ. Гучин нэгэн хүнийг нэгэн дор оршуулсан уг олдворыг анхны байдлаар МЭӨ II зууны үед амьдарч байсан хүннүчүүдийнх гэж үзэж байгаа гэнэ.  Түүхийн хүрээлэнгийнхэн энд гурван жил ажиллаж  малтлага, судалгаа хийсний дүнд тэдгээр шарилыг олж илрүүлжээ. Нэгэн дор байрласан эдгээр булшны хоёрыг нь огт хөндөөгүй, тонож ухаагүй байснаас голдуу ясан эдлэл олдсоны зэрэгцээ өмнө нь олдож байгаагүй үүлэн хээ бүхий бүсний ялтас, сэнжтэй вааран эдлэл зэрэг тэр үеийн  эд өлгийн зүйлс гарсан байна.  
Түүхийн  хүрээлэнгийн Эртний түүх, сурвалж судлалын эрхлэгч С.Өлзийбаяр “Энэ бол манайд олдоод байгаа хүннүгийн үеийн олдвороос хамгийн эртнийх нь. Энэ нь  хүннүчүүдийн оршуулгын газар. Эртний хүннүчүүдийн оршуулгын зан үйлийг судлахад маш чухал, ач холбогдолтой” гээд судалгааны тайланг удахгүй товхимол болгон хэвлүүлнэ гэсэн байна.
Үүний өмнө 2011 онд Улаанбаатар их сургуулийн эрдэмтэн багш нар Архангай аймгийн Өндөр-Улаан сумаас Хүннүгийн үеийн 200 булш олж байсан юм.