Монгол Улсад үндэсний мөнгөн тэмдэгт “Төгрөг”-ийг гүйлгээнд гаргасны 100 жилийн ойг тохиолдуулан Монголбанкнаас “1 Төгрөг” 1 унцын алт болон мөнгөн дурсгалын зоосыг худалдаанд гаргалаа.Монголбанк нь Эрдэнэсийн сангийн тухай хуулийн хүрээнд Улс орны түүхэн онцгой чухал үйл явдал, тэмдэглэлт ойг тохиолдуулан Улсын Их Хурлаар батлагдсан сэдвийн хүрээнд дурсгалын зоос гаргадаг. 2025 онд үндэсний мөнгөн тэмдэгт “Төгрөг”-ийг гүйлгээнд гаргасны 100 жилийн ойг тохиолдуулан 1925 оны гүйлгээний зоосон болон цаасан мөнгөн тэмдэгтийн загвараар дурсгалын зоосыг худалдаанд гаргалаа.
Монгол Улсын төлбөрийн хэрэгслийн түүх нь Монголын эзэнт гүрний үед холбогдох Их бага хаадын алт, мөнгө, зэс зоос болон мөнгөн дэвсгэрт, XVII-XX зууны эхэн үеийн Монголчуудын оюуны болоод эдийн соёлыг илэрхийлэх эд хэрэглэгдэхүүн болох цай, ембүүгээс эхлэлтэй бөгөөд 1921 онд Богд хааны зарлигаар “Бага болзоот” нэртэй улсын зээллэгээг 6 сарын хугацаатай гаргасан нь 1923 он хүртэл мөнгөн тэмдэгтийн үүргийг гүйцэтгэж байв. Мөн Ардын засгийн газраас монгол долларын дэвсгэрт буюу “Данзангийн доллар”-ыг 1921, 1922 онд хэвлүүлсэн.1924 онд Монголбанк буюу Монголын Худалдаа Аж Үйлдвэрийн Банк үүсгэн байгуулагдаж, 1925 оны 12 дугаар сарын 9-ний өдөр 900 сорьцтой цагаан мөнгө, 18 граммын жинтэй “Нэг төгрөг”-ийн зоосон мөнгөн тэмдэгт болон 7 төрлийн цаасан мөнгөн тэмдэгт гүйлгээнд гаргасан байна. Аливаа үндэстний мөнгөн тэмдэгт нь тухайн улсын ёс заншил, бахархал, хөгжлийг өгүүлсэн байдаг бөгөөд 100 жилийн тэртээ Монгол Улсын үндэсний мөнгөн тэмдэгт Төгрөгийг гүйлгээнд гаргасан нь санхүү, төлбөрийн хэрэгслийн түүхэнд чухал ач холбогдолтой юм.
Энэхүү түүхэн ойг тохиолдуулан “1 Төгрөг” дурсгалын зоосыг смартминтинг ултра хай рилийф (smartminting ultra high relief) технологиор, 1 унц буюу 31.1 гр жинтэй, 33 мм диаметртай, 999.9 сорьцтой цагаан мөнгө болон алтаар үйлдвэрлүүлэн худалдаанд гаргаж байна.Мөн Монголбанканд залуучууд, хүүхдүүдэд мөнгөн тэмдэгтийн талаар мэдлэг мэдээлэл олгох зорилготой шинэ танхим нээгдлээ. Энэхүү “Төгрөг 100” үзэсгэлэнгийн танхимд мөнгөн тэмдэгтийн тоног төхөөрөмж, зоос, мөнгөн тэмдэгтийн хэв, мөнгөний нууцлал, алтны жин, 1925 оны үнэн сонин зэрэг эд зүйлсийг дэглэсэн.Монголбанкны Эрдэнэсийн сангаас худалдаалж байгаа дурсгалын зоосны талаарх дэлгэрэнгүй мэдээллийг erdenesiinsan.mn сайтаас авах боломжтой.
