Улсын хэмжээнд 196 мянган өрхийн 300 мянга гаруй малчин бий.
2024 оны 1-р сарын 1-нээс хэрэгжиж эхэлсэн Нийгмийн даатгалын ерөнхий хуулийн шинэчилсэн найруулгад,
21.23.Малчин, туслах малчин энэ хуулийн 7.7-д заасны дагуу даатгуулах бол тухайн үед мөрдөж байгаа сарын хөдөлмөрийн хөлсний доод хэмжээнд ногдох тэтгэврийн даатгалын шимтгэлийн 50 хувийг улсын төсвөөс сар бүр төлнө. Улсын төсвөөс хариуцан төлөх хугацаа 5 жилээс ихгүй байна гэж заасан ч энэ хууль хэрэгжиж эхлээгүй байна.
Энэ талаар ХХААХҮ-ийн сайд М.Бадамсүрэнгээс тодруулахад, Нөхөн сэргээгдэхгүй уул уурхайн баялгаас олж байгаа орлогоос нөхөн сэргээгдэх баялаг болох мал аж ахуй, газар тариалангийн салбараа бид дэмжих ёстой.
Малчдын тэтгэврийн насыг бусад салбараас багаар буюу эрэгтэй 55, эмэгтэй 50 настайдаа тэтгэвэр тогтоолгохоор хуульчилсан нь төрөөс малчдыг дэмжиж буй бодлого юм. Нөгөө талаас малчдын нийгмийн даатгалын шимтгэлийн тодорхой хувийг төрөөс хариуцах тухай Засгийн газрын журам одоогоор батлагдаагүйгээс энэ хууль хэрэгжиж эхлээгүй байна.
Би сайдаар томилогдохоос өмнө УИХ-ын гишүүний хувьд асуулга тавьж, энэ талаар мэдээлэл авсан. Сангийн яамнаас малчдын НДШ-ийн 50 хувийг төрөөс хариуцахад жилд 30-40 тэрбум төгрөгийн ачаалал ирэх нь. Тооцооллыг нарийн хийх шаардлагатай гэдэг үндэслэлээр энэ журам батлагдаагүй байна.
ХХААХҮ-ийн сайдын хувьд малчдынхаа эрх ашгийг хамгаалах үүднээс энэ асуудалд анхаарал хандуулж, шахалт үзүүлж шийдвэрлүүлэхийн төлөө ажиллана гэв.
