Улсын Их Хурлын Эдийн засгийн байнгын хорооны хуралдаанаар Үндэсний Статистикийн Хорооны 2025 оны үйл ажиллагааны тайланг хэлэлцлээ.
Энэ үеэр Үндэсний Статистикийн Хорооны дарга Б.Батдаваа 2025 оны үйл ажиллагааны тайланг танилцуулж, онцлох ажил, төсөл хөтөлбөрүүдийн талаар мэдээлэл хүргэсэн юм. 
Тэрээр "Үндэсний Статистикийн Хороо 2025 онд гар утасны өгөгдөл, машин сургалт, хиймэл оюун ашиглахаас гадна мэдээллийн аюулгүй байдал, дата лаб байгуулах, мэдээллийн чанарыг сайжруулахад анхаарч ажиллалаа. Мөн төрийн суурь болон төрөлжсөн мэдээллийн сангуудыг ашиглан "Хүн ам, орон сууцны тооллого", "Аж ахуйн нэгж, байгууллагын тооллого"-ыг жил бүр зохион байгуулах систем хөгжүүллээ.
Тооллого, судалгаа, захиргааны мэдээллийн задгай өгөгдөлд ажиллаж, дүн шинжилгээ хийх "Дата лаб"-ыг хэрэглээнд нэвтрүүлснээр мэдээллийн аюулгүй байдлын стандартыг хангасан тусгай орчинд судалгаа, шинжилгээ хийх боломж бүрдсэн. Үүнээс гадна “Дотоодын нийт бүтээгдэхүүнийг хэлхээ индекс ашиглан зэрэгцүүлэх үнээр тооцох аргачлал”-ыг баталж, бүх салбарын үйлдвэрлэгчийн үнийн суурь оны тооцоог шинэчлээд байна” хэмээн онцоллоо. 
Үндэсний Статистикийн Хорооноос өнгөрсөн онд 6 бүлгийн 859 статистик үзүүлэлтийг 7-15 хоног, сар, улирал, жилээр бэлтгэн тархааж, 2 тооллого, 9 түүвэр судалгаа зохион байгуулж, үр дүнг нэгтгэн олон нийтэд тархаасан.  
УИХ-ын Эдийн засгийн байнгын хорооны хуралдааны үеэр Улсын Их Хурлын гишүүн Г.Лувсанжамц, Б.Пунсалмаа, О.Батнайрамдал, Л.Соронзонболд нар ҮСХ-ны үйл ажиллагааны тайлантай холбоотой асуулт асууж, байр сууриа илэрхийлсэн юм. Монгол Улсын статистикийн систем нь: 
🔘 Мэдээллийн хамрах хүрээ, нээлттэй байдлын үнэлгээгээр дэлхийд 11 дүгээрт, Зүүн Азид 2 дугаарт, 
🔘 Дэлхийн банкны гүйцэтгэлийн үнэлгээгээр Зүүн Ази, Өмнөд Ази, Номхон далайн орнуудаас 7 дугаар байрт, дэлхийд 47 дугаар байрт эрэмбэлэгджээ.