Шударга өрсөлдөөн, хэрэглэгчийн төлөө газраас Солонгосын “Нонгшим групп”-ийн бэлэн гоймонг худалдаалахыг түр зогсоолоо. Учир нь, тус группийн үйлдвэрлэж буй зургаан төрлийн бэлэн гоймонгийн амтлагчаас бензопирин буюу уушги, давсаг, арьсны хорт хавдар үүсгэгч бодис илэрсэн талаар тус улсын эрүүл мэндийн салбарынхан шуугьж буй. Тиймээс тус группийн манай улсад экспортолсон бэлэн гоймонгийн найрлагад уг хорт бодис байгаа эсэх шинжилгээний хариу гартал түр хугацаагаар худалдаалахыг хориглосон нь энэ аж. Энэ дагуу ч ШӨХТГ-ын дарга О.Магнай өнгөрсөн амралтын өдөр хүнсний захуудаар явж, худалдаалахгүй байхыг удирдлагад нь үүрэг болгожээ. Өнөөгийн байдлаар манай улсад ОХУ, Солонгос, Хятад, Япон зэрэг улсад үйлдвэрлэсэн бэлэн гоймон худалдаалдаг юм байна.