УИХ-ын гишүүн, УИХ дахь эмэгтэйчүүдийн албан бус зөвлөлийн дарга Л.Эрдэнэчимэгийн нэрийн өмнө “Монос”-ын гэх тодотгол байнга уяатай явдаг. Түүнийг эрүүл мэндийн салбарт ажиллахаас гадна уран зураг сонирхдог, хатгамал урладаг гэдгийг хүмүүс тэр бүр мэддэггүй байх аа. Бас чамгүй сайн дуучин гэсэн. Баяр ёслолоор найз нөхөддөө бяцхан концерт ч тоглочихдог юм билээ. Ихэвчлэн гадаад хэлээр дуулдаг гэсэн шүү.
Л.Эрдэнэчимэг гишүүн хүүхэд байхын л уран хатгадаг байсан гэнэ. Одоо харин төрийн ажилд зүтгээд хатгамлаа түр хойш тавиад байгаа аж. Тэр оёсон хатгамлаараа одоо ч гэрээ гоёдог. Мөн хатагтай Л.Эрдэнэчимэг уран зурагт үнэхээр хоббитой нэгэн. Уран зураг бол маш үнэтэй хобби. Тиймдээ ч “Залуудаа уран зураг худалдан авах мөнгөгүй учраас нөхөртэйгээ хамт галерейгээр зугаалах дуртай байлаа. Бараг л шинээр гарч буй үзэсгэлэнг алгасалгүй үздэг байсан” хэмээн дурссан. Харин хожим хувийн бизнес нь чамгүй амжилт олсноор уран зурагт мөнгө зарах боломжтой болсон гэдэг. Өдгөө түүний гэрт цөөн боловч үнэхээр тансаг уран зураг хадгалагддаг юм билээ. Эртний язгууртнуудын тухай өгүүлэх түүний цуглуулсан зургийг харах тутам тайвширдаг гэж дотны найзууд нь ч ярьсан удаатай.