Олон улсын нисэх онгоцны шинэ буудал барих төслийг хэрэгжүүлэх хөнгөлөлттэй зээлийн  гэрээг  Монгол Улсын Засгийн газар, Япон Улсын Олон улсын хамтын ажиллагааны банк хооронд 2008 оны тавдугаар сард байгуулсан билээ.  Уг барил­гын ажлын зураг төслийг Япон улсын “Азуса Секкей”, “Ориентал консалтантс” ком­пани 2011 онд боловсруулж дуусгасан. Зураг төслийн дагуу нисэх буудлын үндсэн барилга байгууламжийг барих ажлыг Японы барилгын мэргэшсэн байгууллагууд гүйцэтгэхээр зээлийн гэрээнд заасан юм. Энэ дагуу Зам, тээврийн сай­дын тушаалаар Үнэлгээний хороо байгуулагдаж ерөн­хий гүйцэтгэгчийг сонгон шалга­руулах саналыг өнгөрсөн баасан гарагт авлаа. Тен­дерт Японы хоёр хуулийн эт­гээд оролцох сонирхлоо илэрхийлэн саналаа ирүүлс­нийг Үнэлгээний хороо албан ёсоор хүлээн авсан нь энэ аж. Үнэлгээний ажлыг хоёр үе шаттай хийж, эхний ээлжинд техник, дараа нь санхүүгийн саналыг нь үнэлэх аж.
 Төв аймгийн Хөшигтийн хөндийд Олон улсын шинэ нисэх буудал баригдсанаар одоогийн нисэх онгоцны буудлын үйлчилгээнд тулгарч буй хүндрэл арилж, нислэгийн аюулгүй ажиллагааг дээшлүүлэн манай улсын иргэний агаарын тээврийн хөгжил шинэ үе шатанд орох юм. Шинэ нисэх буудал нь 2016 оны аравдугаар сард ашиглалтад орж, буудлын зорчигч үйлчилгээний барилга нь жилдээ  гурван сая зорчигч хүлээн авах  хүчин чадалтай орчин үеийн стандартаар тоноглогдох аж.
Түүнчлэн цаг агаарын тааламжгүй байдал, салхины чиглэлээс үл хамааран 24 цагийн турш агаарын хөлөг хүлээн авах хоёр талын орох гарах зурвастай, нислэгийн хөдөлгөөнийг удирдах цамхаг болон бие даасан дэд бүтцийн байгууламжийн хамт баригдах юм. Монгол-Японы хамтарсан төслийн багийн инженерүүд цаашид шинэ нисэх буудлыг жилдээ 18 сая хүртэл зорчигч хүлээн авах хэмжээнд өргөтгөж болохоор зай талбайг нөөцөлсөн төлөвлөлт хийсэн гэнэ. Зээлийн гэрээнд хүлээсэн үүргийн дагуу энэ онд Монгол Улсын Засгийн газраас 110 квт-ын бие даасан хоёр эх үүсвэртэй шугам, шилэн кабелийн шугам, үерээс хамгаалах далан зэрэг нийт 14 тэрбум орчим төгрөгийн ажлыг эхлүүлээд байгаа аж.
Мөн нийслэлийн хөрөнгө оруулалтаар барих шинэ нисэх буудал хүрэх авто замын ажлын эхний хэсэг болох зургаан эгнээ бүхий 17,7 км замын өргөтгөлийг 2013 онд дуусгахаар төлөвлөжээ.