Орон нутгийн ээлжит сонгууль энэ сарын 21-ний өдөр болно. Сонгуулийн үйл ажиллагааг хэвийн явуулах үүднээс Нийслэлийн Засаг дарга бөгөөд Улаанбаатар хотын Захирагч Э-Бат-Үүл, санал авах өдөр зохион байгуулах зарим арга хэмжээний тухай Захирамж гаргалаа. Тус Захирамжинд,  2012 оны 11 сарын 21-ний өдөр  нийслэлийн нутаг дэвсгэрт архи, согтууруулах ундаа худалдах, түүгээр үйлчлэхийг хориглосугай, сонгуулийн санал авах өдөр нийслэлийн нутгийн захиргааны холбогдох байгууллага, сонгуулийн тойрог, хэсгийн хороодын хэвийн ажиллах нөхцөл бололцоог бүрдүүлэх, сонгуулийн байгууллагууд /Санал авах байр/-ыг телефон утас, цахилгаан эрчим хүчээр таслахгүй, найдвартай хангах, хотын нийтийн тээврийн үйлчилгээг хэвийн явуулах талаар зохион байгуулалтын арга хэмжээ авч ажиллахыг “Улаанбаатар цахилгаан түгээх сүлжээ” ХК , “Мэдээлэл холбооны сүлжээ” ТӨК,  нийслэлийн Нийтийн тээврийн газарт тус тус үүрэг болгосугай, Иргэдийн сонгуульд оролцох нөхцлийг бүрдүүлэх зорилгоор “Нарантуул”,   “Хархорин”, “Да Хүрээ”, “Өгөөмөр”, “100 айл”, “Гурвалжин” орчмын барилгын материалын зах, худалдааны төвүүдийн тухайн 7 хоногийн амралтын өдрийг сонгуулийн санал авах өдөр  /11 дүгээр сарын 21/-рүү шилжүүлж, зохион байгуулалтын арга хэмжээ авахыг аж ахуйн нэгж, байгууллагын удирдлагуудад үүрэг болгосугай хэмээн заасан байна гэж Нийслэлийн хэвлэл мэдээллийн албанаас мэдээллээ.