Монгол Улсын зээлжих зэрэглэлийг олон улсад нэр хүндтэй  “Стандарт энд Пүүрс”, “Фитч”, “Мүүдийз” гэсэн гурван компани тогтоожээ. Тэд 2012 оны зэрэглэлийг “Стандарт энд Пүүрс” BB- “тогтвортой”,  “Мүүдийз  B1 “тогтвортой”, “Фитч B+ “тогтвортой” гэж тодорхойлсон байна. Тэгээд Монголын зээлжих зэрэглэл буурахад сөргөөр нөлөөлж болзошгүй байдлыг тодорхойлжээ. Үүнд, улс төрийн тодорхой бус байдал, төсвийн тогтвортой байдлын тухай хууль бодитоор хэрэгжиж эхлээгүй, гаднаас хэт хараат эдийн засгийн бүтэцтэй буюу экспортын орлого буурч, гадаад тэнцвэргүй байдал үүсэх эрсдэл өндөр, улсын гадаад өр хэт их хурдацтайгаар өсөх хандлага бий гэсэн аж. Улсын өрийн тухайд  Засгийн газрын шууд баталгаатайгаар Хөгжлийн банк 600 сая ам.долларын үнэт цаас гаргасан. Дээр нь, дахиж Засгийн газрын 1.5-2.0 тэрбум ам.долларын бонд гаргахаар төлөвлөж байгааг дурджээ.
Үүнээс гадна Монгол Улс зээлжих зэрэглэлээ нэмэгдүүлэх боломж байгааг ч бас өгүүлсэн байна. Тухайлбал,  эдийн засгийн халалт үүсч болзошгүй эрсдэлийг хааж, мөчлөг дагасан бодлогоос татгалзах,  Төсвийн тогтвортой байдлын тухай хуулийг тууштай дагаж мөрдөх, төсвийг экспортын бүтээгдэхүүний үнийн бууралтаас хамгаалах, уул уурхайгаас  олох их хэмжээний орлогыг зөв зохистой зарцуулах тогтолцоог бүрдүүлэх, гадны нөхцөл байдлаас хэт хараат, савалгаа ихтэй жижиг эдийн засгийн хараат байдлыг багасган тогтворжуулах, төрөлжүүлэх хэрэгтэй гэжээ. Түүнчлэн Хөгжлийн банкны бие даасан, хараат бус байдлыг сайжруулах, инфляцыг нэг оронтой тоонд  буулгах, гадаад тэнцлээ сайжруулах, гадаад валютын нөөцөө нэмэгдүүлэх замаар эдийн засгийг гадаад цочролоос хамгаалах нь чухал гэжээ.