Холливудын од Холли Берригийн шинэ, хуучин хоёр амраг хоорондоо зодолдож, экс нөхөр нь баривчлагдсан явдал Талархалын баярын өдөр гарчээ. Тэдний хооронд нэлээд ширүүн зодоон болсон бөгөөд хоёулаа багагүй гэмтэл шархтай, хоцорч Лос-Анжелосын эмнэлэгт очиж, тусламж авчээ.
Хэрэг явдал Холлигийн хуучин нөхөр, загвар өмсөгч Габриель Обри охиноо гэрт нь хүргэж өгөхөөр ирснээс үүджээ. Баяр тохиолдуулан охинтойгоо уулзаад, хэсэг хамт байсан тэрээр Нала охиноо гэрт нь авчрах үеэр Холлигийн шинэ нөхөр, Францын жүжигчин Оливер Мартинез түүнтэй ярилцахыг хүсчээ. Холли Берри хуучин нөхөртэйгөө шүүхээр маргалдаж байгаа учир энэ хэргийг нэг тийш болгохын тулд Оливер түүнтэй ярилцахыг оролджээ. Холли Берри франц найз залуугаа дагаад эх оронд нь очиж амьдрахыг хүсч байгаа ч хуучин нөхөр нь охиноо харь орон руу явуулахгүй хэмээн эсэргүүцэж, энэ асуудлыг шүүхээр хэлэлцэж байгаа аж. Хэдхэн хоногийн өмнө шүүхээс Холли Берриг охино авч, хилийн чанадад амьдрахыг хориглосон шийдвэр гаргасан байна. Тиймээс энэ тухай ярилцаж, охины эцгийн бодлыг өөрчлөх гэж оролдсон боловч тэд маргалдаж, улмаар зодоон үүсчээ.

Зодооны улмаас Габриель Обри хавиргаа хугалж, нүүрэндээ шарх авсан бол Оливер Мартинез хүзүүгээ гэмтээжээ. Зодооныг үүсгэсэн гэдгээр Холлигийн хуучин нөхрийг цагдаагийнхан баривчилсан бөгөөд 20 мянган ам.долларын барьцаагаар удалгүй сулласан байна. Түүнийг Холли болон түүний найз залуугаас 100 ярдын зайтай явахыг шүүхээс сануулжээ.
Холли Берри охиныхоо ааваас хоёр жилийн өмнө салж, Оливер Мартинезтай дотноссон юм. Тэрээр шинэ амрагтайгаа гэрлэх төлөвлөгөөтэй байгаа ч хуучин нөхөртэйгөө үүсгэсэн маргаан нь Франц руу явахад саад болоод байгаа аж.



Зодоон болохын өмнө

Оливер Мартинезийн гаранд үл мэдэг шалбархай үлджээ.