Монгол Улсын нийт нутаг дэвсгэрт “100 мянган нарны гэр” төсөл 13 сая ам.долларын өртгөөр амжилттай хэрэгжиж дуусчээ. Малчин өрхүүдийг байгаль орчинд ээлтэй нарны зайгаар хангаж, өрхийн хэрэглээний эрчим хүчтэй болгох зорилготой төсөл юм. Одоогийн байдлаар 100 мянга 146 нүүдэлчин айл нарны зайгаар эрчим хүчийг ашиглаж байгаа төдийгүй ихэнх нь алслагдсан суманд амьдардаг аж.
Төвийн цахилгаан шугам сүлжээнд нүүдэлчин иргэд байнга холбогдох боломжгүй байдаг бол өрх бүр нарны зайг ашиглаад хаана ч эрчим хүчээр гачигдахгүй амьдарч байна. Дэлхийн банкнаас хэрэгжүүлсэн дээрх төслийг зохион байгуулахад нийт сумын удирдлага, орон нутгийн өөрөө удирдах байгууллагынхан тусалсан гэнэ. Иргэдэд 50 хувь хөнгөлөлттэй үнээр нарны зайг худалдаж, малчид байгаль орчинд хөр нөлөөгүйгээр ахуйн цахилгаан хэрэгслийг ашиглах болжээ.