Нарантуул, Хар хорин гэх мэт зах, худалдааны төвөөр үйлчлүүлэхээр дотогш нэвтрэхдээ үйлчлүүлэгчид 50 төгрөг төлдөг. Худалдааны төвөөр нь үйлчлүүлэх гэж байж татвар төлж байгаа мэт давхар мөнгө төлдөг ийм хачирхалтай журам Монголд л байдаг байх. Тэгвэл энэ явдал 2012 оны арваннэгдүгээр сараар дуусгавар болж байна. Шударга өрсөлдөөн хэрэглэгчийн төлөө газрын гаргасан шийдвэрээр ирэх сарын 1-нээс эхлэн захуудын авдаг 50 төгрөгийн хураамжийг үгүй болгожээ. Энэ тухай шийдвэрээ ШӨХТГ-ын дарга О.Магнай танилцуулахдаа “Үзвэр үйлчилгээтэй музей, театр зэрэг газарт төлбөр төлөх нь зайлшгүй. Харин худалдааны төвөөр нь үйлчлүүлэх гэж байхад билет тасалдаг явдал байж таарахгүй” хэмээн мэдэгдсэн юм.