Мөрдөн байцаах газрын Эдийн засгийн гэмт хэрэг мөрдөх хэлтсээс “Дэлхийг тойрон аялагчдын клуб” төрийн бус байгууллагынханд эрүүгийн хэрэг үүсгэжээ. Тус байгууллага “АНУ-ын “Даймонд холидэй” компанитай түншлэлийн холбоотой. Монголын иргэдийг гадаадад аялуулна, урт болон богино хугацаагаар жуулчлалд урьж байна. Иргэдийг гадаадад сургана” гэх мэтээр сүлжээ үүсгэн бусдаас их хэмжээний мөнгө залилсан байна.
Тэд хэвлэл мэдээллийн хэрэгслээр зар түгээж, цахим хуудсаар дамжуулан сүлжээндээ гишүүн бүртгэдэг аж. Ингэхдээ нэг иргэнээс бүртгэлийн хураамж гэж 205-380 ам.доллар авч, гишүүнчлэлээр оруулсан хүн бүрт тодорхой хэмжээний урамшуулал олгох байдлаар бүртгэл явуулжээ.
 Одоогоор Мөрдөн байцаах газар залилуулж хохирсон 380 гаруй иргэний өргөдлийг хүлээж аваад байна. Дээрх ТББ нэг ч иргэнийг гадаад улс руу явуулаагүй нь мөрдөн байцаалтын явцад тодорхой болжээ.