Өмнөговь аймгийн ИТХ анхны хуралдаанаа хийж Засаг дарга, ИТХ-ын даргаа сонголоо. Хуралдааныг хуулийн дагуу төлөөлөгчдийн хамгийн ахмад настай Даланзадгад сумын 3-р багаас сонгогдсон Л.Цэцэг-Өлзий даргалсан юм. Хуралдааны дүрмийн дагуу төлөөлөгчөөр сонгогдсон төлөөлөгчид ИТХ-ын дарга сонгох санал хураажээ. ИТХ-д олонхи болсон Ардчилсан намын зүгээс ИТХ-ын даргад Н.Энхбатыг, Х.Түмэнбаярын нэрийг дэвшүүлж, нууц санал хураасан байна. Төлөөлөгчдийн 63 хувийн санал буюу 21 хүний саналаар Х.Түмэнбаяр Өмнөговь аймгийн ИТХ-ын даргаар сонгогджээ. Мөн анхны хуралдаанаар тэргүүлэгчдийг баталжээ. Өмнөх ИТХ-д 25 төлөөлөгчтэй байхдаа 9 тэргүүлэгчтэй байсан бол энэ удаад төлөөлөгчийн тоо нэмэгдэж 33 болсон тул 11 тэргүүлэгч байх нь зүйтэй хэмээн 100 хувь дэмжсэн юм. Ингээд намуудын саналыг харгалзан үзэж МАН 3, Ардчилсан нам 8 тэргүүлэгчтэй байхаар тогтсон аж.  
Уг хуралдаанаар хэлэлцсэн гол асуудлын нэг нь аймгийн Засаг даргын сонгох явдал байлаа. Ардчилсан намын зүгээс одоо аймгийн Засаг даргаар ажиллаж байгаа Б.Бадрааг нэр дэвшүүлсэн бол МАН, МАХН-ын зүгээр нэр дэвшүүлээгүй байна. Ингээд төлөөлөгчдийн 100 хувийн саналаар Б.Бадрааг аймгийн Засаг даргаар дахин сонгосныг Ерөнхий сайд Н.Алтанхуяг батламжилсан юм.