Нийслэлийн байгаль хамгаалах газраас 10, 11-р сард Туул голын ойролцоох суурьшлын бүсэд хайрганы хайгуулын болон олборлолтын зөвшөөрөлтэй 84 байгууллага ажиллаж байгааг шалгалтаар тогтоожээ. Мөн “Эрэл”, “Туул сонгинын усны нөөц” компани, “СТН” Улсын үйлдвэрийн газар, “Баярс констракшн” зэрэг найман аж ахуйн нэгжийн экологид учруулсан хохирлыг нөхөн сэргээх зардалд 9 тэрбум төгрөг шаардлагатай гэсэн тооцоо гарсан байна. Энэхүү хайрганы карьерууд нь Туул голын урсац болон Өлзийт хорооллын оршин суугчдын амьдрах орчин, зам харгуйд сөргөөр нөлөөлж байгаа аж. Тиймээс үүнийг цаашид үйл ажиллагааг нь бүрэн зогсоох үүднээс Туул голын ай савд үйл ажиллагаа явуулж байгаа аж ахуйн нэгжүүдийн тусгай зөвшөөрлийг цуцалж, үйл ажиллагааг нь зогсоох хүсэлтийг хотын захирагчид хүргүүлэх аж.
Дээрх 84 аж ахуйн нэгжийн тусгай зөвш өөрлийг цуцлаад зогсохгүй, ашигласан талбай тус бүрт нь нөхөн сэргээлт хийлгүүлэх юм. Эсвэл нөхөн сэргээлтэд шаардлагатай хөрөнгийг тухайн аж ахуйн нэгжээр гаргуулж, мэргэжлийн байгууллагуудаар гүйцэтгүүлэх аж. Өнгөрсөн хоёр сарын хугацаанд Туул голын орчимд олборлолт хийж байсан ч нөхөн сэргээлт хийлгүй орхисон найман байгууллагын байгаль орчинд нөлөөлөх байдлын нарийвчилсан үнэлгээг Нийслэлийн байгаль хамгаалах газраас тооцон гаргажээ.