Сонгинохайрхан дүүргийн ИТХ-ын анхдугаар чуулган хуралдаж, дүүргийн Засаг дарга, ИТХ-ын даргаа сонгожээ. Энэ дүүргийн хувьд орон нутгийн сонгуулиар МАН олонх болсон. Гэтэл ИТХ-ын хурлын сонгуульд АН болон, МАХН-аас сонгогдсон гишүүд оролцоогүй аж. Учир нь, МАН-аас сонгогдсон таван төлөөлөгч нь сонгуулийн хууль зөрчсөн гэж үзээд шүүхэд хандаад байгаа юм байна. Гэсэн хэдий ч МАН олонх болсон болж, хурлын ирц хүрсэн болохоор дүүргийн Засаг даргаа сонгожээ. Дүүргийн Засаг даргаар өнгөрсөн дөрвөн жилд тус дүүргийн Засаг даргын орлогчоор ажиллаж байсан Р.Дагвыг сонгосон байна. Харин ИТХ-ын даргаар тус дүүргийн МАН-ын хорооны дэд дарга Х.Намбаатарыг сонгожээ.