Шар айраг уух нь эрүүл мэндэд тустай гэж Японы шар айраг үйлдвэрлэгч “Sapporo” компани саяхан хийсэн судалгаандаа үндэслэж мэдэгджээ. Шар айрагны найрлаганд ордог үндсэн гурван түүхийн эдийн нэг болох зөрөг цэцэг нь хүний бие дэх ханиад томуу, бронхит үүсгэдэг вирусийг устгадаг ажээ. Уг цэцэгт байх хумулон хэмээх бодис ийм үүрэг гүйцэтгэдэг байна. Уг бодисоор хийсэн вакцин ханиад томууны эсрэг гайхалтай сайн үйлчилдэг хэмээн шар айраг үйлдвэрлэгч мэдэгдсэн ч ганцхан лаазыг уугаад ханиадыг эдгээх хэмжээнд нөлөөлөхгүй гэнэ. Бүр ганц хоёроор ч тогтохгүй 30 лааз шар айраг ууж байж ханиадны вирусийн эсрэг тэмцэх хэмжээнд хүрэх ажээ. Тэгэхээр шар айргаар ханиадыг эмчлэх гээд өөр өвчин л олж магадгүй бололтой.
Шар айраг ханиаднаас сэргийлж, эдгээхээс гадна ясны сийрэгжилтийг бууруулах, зүрхний өвчний эрсдлийг багасгах, Альцгеймерийн өвчний эсрэг сайн нөлөөтэй хэмээн үйлдвэрлэгчид нь сурталчилдэг билээ. Мөн шар айргаар үс угаахад гялалздаг нь зөрөг цэцгийн найрлага дахь протейний үйлчилгээ ажээ.