Т.Аятунгаатай холбогдох учир битүүлэг хэргийн үйл явц улам тодорхой болсоор байна. Түүний хүүхдийн эцэг Чарльз Эдвардын “Facebook” хуудсандаа нийтэлсэн шүүхийн бичиг баримтад дурдсанаар өөрийгөө хохирогч гэх Т.Аятунгаа хүүхдэдээ харгис балмадаар хандаж, шидсэнээс болоод тархиндаа төдийгүй биеийн хэд хэдэн хэсэгт бэртэл гэмтэл авсан болохыг баталсан байна.

Филиппиний Батангас хотын прокурорын газраас гаргасан протоколд бичсэнийг товчлон сийрүүлбэл,
“Аятунгаа Хиад Тодруулыг ойр дотныхоо хүнийг хөнөөхийг завдсан /Frustrated Parricide/ хэргээр эрүүгийн хуулийн 246 дугаар зүйлийн дагуу буруутгаж байна. Хэрэг 2012 оны арваннэгдүгээр сарын 5-нд Филиппиний Батангас мужийн Мабини засаг захиргааны нэгжийн Барангай Анилаогийн Артур Плэйст гарсан. Дээр дурдсан сэжигтэн нь ямар ч зөвтгөх шалтгаангүйгээр, хууль бусаар өөрийн таван сартай охин Тэргэлсар Чарльз Эдвард Красни Эргенийг газар шидэж,  хүндээр гэмтээсэн. Тэрээр ямар ч анхааруулга сануулга өгөхгүйгээр хүүхдээ гэнэт шидэхдээ “Энэ хүүхэд үхэх ёстой” гэж хэлсэн бөгөөд  хүүхэд тархиндаа болон биеийнхээ бусад хэсэгт хэд хэдэн гэмтэл авч, 10-аас дээш хоног эмчлүүлэх шаардлагатай болсон” хэмээн бичсэн байна.  Энэ бол 2013 оны хоёрдугаар сарын 7-нд гаргасан протокол ба мөн энэ өдөр гаргасан прокурорын батламжид ингэж бичсэн байна.

“Т.Аятунгаагийн эсрэг үүсгэсэн хэргийг урьдчилсан байдлаар шалгаж үзэхэд  гомдол гаргасан гэрчийн мэдүүлэг  болон бусад баримт нь гэмт хэрэг гарсан гэдгийг нотолж чадахуйц, сэжигтэн этгээд буруутай гэдгийг батлахуйц байгаа учир гомдол гаргагчид баримтаа ашиглан шүүхэд хандах эрх олгож байна” гэсэн байна. Мөн энэ хэргийн гэрчээр Чарльз Эдвард болон Лусеро Салве болон бусад хүнийг татаж байгааг уг бичигт дурдаад сэжигтний оршин суугаа хаягийг Монголын өргөмжит консул хэмээн бичсэн байна. Түүнчлэн Т.Аятунгааг 2000 мянган песогийн барьцаатайгаар батлан даалтад гаргаж болно гэжээ.

Шүүх, прокурорын газраас гаргасан энэ хоёр баримт болон манай өмнөх мэдээлэлд дурдсан Т.Аятунгааг баривчлах шүүхийн тогтоол зэргээс харвал хэрэв Т.Аятунгаа Филиппиний газар нутгаас оргон зайлж Монголд ирээгүй бол ойр дотныхоо хүний амь насанд халдахыг завдсан гэдэг хэргээр гарцаагүй хууль шүүхийн өмнө очих байжээ.