Байгаль нуур орчмоор хувиараа аялж зугаалж байгаа хүмүүсээс татвар хураамж авах нь зүйтэй гэж Буриадын шинэ тэргүүн Алексей Цыденов санал болгож байгаагаа Красноярскт болсон эдийн засгийн форумын үеэр илэрхийлсэн байна.

Түүнийхээр бол хөрш Монголын иргэд өөрийн автомашинаараа давхиж ирээд нуурын эрэг орчмоор зугаалж, амраад зүгээр л буцаад явчихдаг. Тэд ямар  ч татвар хураамж төлдөггүй атлаа байгаль орчинд хохирол учруулж, нутгийн иргэдэд дарамт болдог.

Ийм учраас тэрээр ОХУ-ын Тээвроийн сайд болон Аялал жуулчлалын Холбооны агентлагийн дэд захирал Николай Королёвт санал тавьж Байгаль нуурын орчмоор аялж зугаалж байгаа хүмүүсээс татвар авах санал тавьсан байна.

Королёв хариуд нь “Байгаль- аугаа том нуур, аугаа том гүрэн” хөтөлбөр боловсруулах явцдаа  татвар хураамж авах асуудлыг авч үзнэ гэсэн байна. “Энэ асуудлыг зөв шийдвэрлэж, зөв зохион байгуулж чадвал байгаль орчныг хамгаалахад нэлээд асуудлыг шийдэж чадна” гэж тэр хэлжээ.