Азийн дунд сургуулийн сурагчид бусад тивийнхийг бодвол ерөнхий мэдлэгийн хичээлүүддээ илүү амжилттай суралцаж байгаа юм. Эдийн засгийн хамтын ажиллагаа, хөгжлийн байгууллагаас (OECD) гаргасан “2012 оны олон улсын сурагчдын сурлагын үнэлгээ (PISA)”-нээс харвал БНСУ, Хятад, Гонконг, Сингапур зэрэг Азийн орнуудын сурагчид уг жагсаалтыг тэргүүлж байна. OECD-ын гишүүн 34 орныг оруулаад нийт 65 орны 510 мянган сурагчдын дунд хийсэн уг судалгааны дүнд Хятадын Шанхайн сурагчид тоо бодлого, унших бичих, шинжлэх ухааны зэрэг бусад бүх төрлийн хичээлүүдэд эхний байрт оржээ. Түүнчлэн OECD-аас үнэлгээний үндсэн шалгуур болгодог тооны хичээлд Хятадын дараа Гонконг, Тайвань, БНСУ, Макао, Японы сурагчид орсон байна. Унших бичих хичээлд мөн л Шанхай, Гонконг, Сингапур, БНСУ-ын сурагчид тэргүүлсэн байна. Харин АНУ, Их Британи, Франц, Герман зэрэг Америк, Европ тивийн голлох орны сурагчид харьцангуй доогуур байрт орсон аж. OECD-аас энэ удаагийн судалгаагаар дээгүүр байрт орсон Азийн орнууд багшийн чанарт илүүтэй анхаарч байгааг онцлов.