Хонконгт шувууны томуугийн "Эйч7-Эн9" вирус хүнд халдварласан анхны тохиолдол бүртгэгдсэн гэж Хонконгийн эрүүл мэндийн газрын албаны хүмүүс мэдэгдлээ.

Гэрийн үйлчлэгчээр ажилладаг, 36 настай индонез эмэгтэй уг вирусын халдвар авсан болохыг Хонконгийн "Хоол хүнс болон эрүүл мэндийн товчоо"-ноос мэдэгдсэн байна.
Түүнийг эмнэлэгт хэвтүүлсэн бөгөөд бие нь тааруухан байгаа аж.
Тэрбээр өнгөрөгч сарын 17-нд эх газрын Хятадын Шэньжэнь хотод тахиа нядалж, идсэн гэсэн мэдээлэл байна.
Хонконгийн эрүүл мэндийн газрын удирдлагууд эх газрын Хятадаас амьд шувуу импортлохыг хориглож, тахианы фермүүдийг ариутгах болжээ.
Өнгөрсөн гуравдугаар сард дэгдсэн, шувууны томуугийн "Эйч7-Эн9" вирус хүнд халдварласан 140 гаруй тохиолдол эх газрын Хятад болон Тайваньд бүртгэгдсэн байна.