Жүжигчин Анжелина Жоли "ELLE" сэтгүүлийн сүүлийн дугаарт ярилцлага өгч, нүүрийг нь чимжээ. Сүүлийн хэдэн жил кинонд тоглохоос илүү найруулах ажилд анхаарч, бас эрүүл мэндийн санаа зовоосон асуудал ч гарч ирж, олон юм үзэж туулсан тэрээр хувийн амьдралынхаа тухай дэлгэрэнгүй ярьжээ.
Тогтворгүй гэр бүлд төрж өссөн болохоороо сайхан гэр бүлийн тухай ойлголт ч үгүй,  тэгж амьдарна гэж огтхон ч төсөөлдөггүй байсан тухайгаа А.Жоли ярьжээ. Тийм ч учраас 20 гаруйхан настай залуу бүсгүй байхдаа хоёр ч удаа гэрлэлт нь бүтэлгүйтэж, заримдаа бусдын гайхашруулам этгээд үйлдэл хийдэг байж. Харин Брэд Питтэй учирснаар тэр жинхэнэ хайр дурлал, насныхаа ханийг олсон гэдгээ бахархалтайгаар өгүүлжээ. Дэлхийн хамгийн сайхан бүсгүйчүүдийн нэг гэж зүй ёсоор хэлэгддэг Анжелина Жоли хэлэхдээ “Би хэзээ ч хүүхэдтэй болно, хэзээ ч ингэж аз жаргалтайгаар дурлана, зөв хүнтэй учирна гэж бодож байгаагүй. Миний хувьд сайхан гэр бүл гэдэг үлгэрт л гардаг гэж боддог байсан. Гэвч Б.Питтэй учирснаар амьдрал минь өөрчлөгдсөн” гэж ярьжээ.
А.Жолигийн хамгийн сүүлд тоглосон “Maleficent” кино дэлхийн театруудаар нээлтээ хийж байгаатай холбогдуулан тэрээр дээрх ярилцлагыг өгсөн юм. Тэрээр өчигдөр гэхэд Их Британийн Кенсингтон ордонд киноны нээлтийн хүлээн авалтад Брэд Питт болон том хүү Мэддоксын хамт оролцжээ.