Харгис эзний боолчлолд 50 жил байсан Ражи нэртэй зааныг энэтхэгийн амьтан хамгаалах нийгэмлэгийн ажилтнууд чөлөөлсөн байна. Гадаадын хэвлэлүүдийн бичсэнээр бол жинхэнэ хэрцгий эзний нь дарлалаас чөлөөлсний дараа хөөрхий заан уйлж байсан гэнэ.

Энэтхэгийн Уттар-Прадеш мужид Ражи нэрт зааныг эзэн нь байнга гинжилж, зодож тамладаг байсан гэнэ. Өрөвдөлтэй заан өдөр бүрий хашааны гадуун өнгөрч байгаа хүмүүс рүү өршөөл эрсэн харцаар харж, зарим нь жаал жуухан идэх юм шидэж өгдөг байсныг нутгийнхан ярьжээ.

Амьтан хамгаалагчид золгүй зааны түүхийг сонсч, энэ дарлалаас нь чөлөөлөх гэж бараг нэг жил хэртэй хөөцөлдсөн байна. Арай гэж энэ бүхэн бүтэж зааныг гинжнээс нь салгахад зааны нүдэнд нулимс цийлэгнэж байжээ.

“Ражу 50 жилийн туршид хөлдөө байнгын гинжтэй байж, тэр нь хөлийг нь шархлуулан хөдлөх бүрт нь шархнаас нь цус гарч байдаг байсан. Өвдөх, харгис, хатуурхал гээд бүхнийг л туулсан даа” гэж  аврах ажилд оролцсон хүмүүсийн нэгний яриаг Life News иш татжээ.

Чөлөөлөгдсөн Ражиг одоо зэрлэг амьтан хамгаалах төвд аваачин  хооллож, эмнэлгийн тусламж үзүүлж эхэлжээ. Бас амьтан хамгаалах төвийн идэвхтнүүд харгислалд өртсөн хөөрхий заанд тусламж болгон 10 мянган фунт цуглуулж өгчээ.