Америкийн Орегон мужийн Лейксайд хотын иргэн Жессика Роча гэгчийг хөрш эмэгтэйндээ дайран орж шатнаас түлхэн унагаад, үснээс нь зулгааж, нүүрийг нь хазсаны төлөө хууль сахиулагчид баривчилжээ. Өнгөрсөн сарын 8-нд 21 настай Роча 37 настай Эрика Тейтийн гэрт өглөөгүүр давхин орж хөршийгөө “барьж идэх”-ээр дайрсныгаа “зомби болж тоглож байсан юм” гэж тайлбарлажээ. Тухайн үед Роча бүсгүй архи уусан юм уу, мансууруулах бодис хэрэглэсэн төрхтэй байсан гэнэ. Үүний дараа бүсгүй юу ч болоогүй юм шиг гарч явахад нь Эрика цагдаа дуудсан байна. Түүнийг баривчлан бусдын орон байранд хууль бусаар нэвтэрсэн, будын эрх чөлөөнд халдаж эрүүл мэндэд хор учруулсан хэмээн буруутгаж байгаа юм байна. Коос тойргийн цагдаагийн дарга Пат Даунинг “Эмэгтэйн яриад байгаа зомби тоглоом гэдгийг ёстой ойлгохгүй юм. Магадгүй тэр компьютер тоглоомд хэт донтосноос ингэсэн ч байж мэдэх юм” гэжээ.