Америкийн Делавэр мужийн Ньюпорт хотын нэгэн иргэн пиццаны газрыг дээрэмдэх гээд бүтэлгүйтсэнийхээ төлөө  зоогийн газрын ажилтнууд, цагдаагийн ажилтныг дээрэм хийхэд саад болсон гэж шүүхэд өгч 260 мянган доллар нэхэмжилсэн байна. 23 настай Найжел Сайкс пиццаны Seasons Pizza газрын зургаан ажилтныг цагдаагийн хоёр ажилтантай хамтарч өөртэй нь зүй бусаар харьцсан, хэрцгийгээр хандлаа хэмээн ийн гомдолложээ.
Тэрээр зоогийн газарт орж ирээд гар буугаар сүрдүүлэн мөнгө нэхэж нэг удаа буудсан ч азаар хэн нэгэн өртөөгүй байна. Зоогийн газрын ажилтнууд түүнийг барьж аван газар унагаж бууг нь булааж авчээ.
Дээрэмчин гомдол гаргасан өргөдөлдөө тэр хүмүүс өөртэй нь зүй бус харьцан бууг нь булааж, зэвсэггүй болсон хойно нь үргэлжлүүлэн зодсон, бас халуун шөлөөр цацсан гэж бичсэн байна.
Өнгөрсөн долдугаар сард болсон энэ хэргийн дараа Сайксыг баривчилж зэвсэглэн дээрэм хийхийг завдсан хэргийн нь төлөө 15 жилийн хорих ялаар шийтгэжээ. Орон нутгийн цагдаагийн дарга Майкл Каприглён “Хэрэв энэ хэрэг эмгэнэлтэй биш байсансан бол инээдэмтэй байх байлаа” гэсэн байна.