Америк хөлбөмбөгийн NFL-ийн од Адриан Петерсон хүүхдээ зодож, гэр бүлийн хүчирхийлэл үйлдсэн хэргээс ялгүй мултарч чаджээ. Хүүгээ зодож гэмтээсэн түүнд хоёр жил хорих ял төлөвлөөд байсан ч шүүх түүний хүсэлт гуйлтыг харгалзан үзэж, хоёр жилийн тэнсэн, 4000 ам.долларын торгууль ногдуулжээ. Тэрээр бас 80 цаг нийгмийн ажил хийх ёстой болж. “Minnesota Vikings” багийн тоглогч А.Петерсон төрсөн хүүгээ модон саваагаар зодсон хэргийг өнгөрсөн тавдугаар сараас шалгаж эхэлсэн юм. Тэр хэлэхдээ хүүгээ хүмүүжүүлэх гэж алганы амт үзүүлсэн гэж байгаа ч хүүгийн биед үүссэн шарх жирийн нэг эцэг хүний хүүхдээ сургах арга биш байсныг нь нотолсон юм. Хүүгийн нуруу, хөл хавиар ихээхэн хөхөрч, зүсэгдсэн байжээ.

А.Петерсоны энэ хэрэг бол сүүлийн үед NFL-ийн од тоглогчдын нэр хүндийг унагаад байгаа гэр бүлийн хүчирхийллийн хэргийн зөвхөн нэг жишээ. Америк хөлбөмбөгийн одод дунд гэр бүлийнхнээ, эхнэр хүүхдүүдээ зодож танхайрдаг, хүчирхийлдэг явдал эртнээс байсныг, одоо энэ бүхнийг зогсоож, тэдэнд хууль ёсны болоод ёс суртахууны шийтгэл хүлээлгэх ёстой гэсэн шүүмжлэл нийгэмд асар их өрнөж байгаа юм. Энэ шүүмжлэл хүчтэй өрнөх болсон нь мөн л NFL-ийн нэгэн оглогч сүйт бүсгүйгээ цахилгаан шатан дотор зодож буй бичлэг нийтэд цацагдсанаас үүдэлтэй юм.