“Apple” компанийн зах зээлийн үнэлгээ мягмар гарагийн өглөө 700 тэрбум ам.долларт хүрч, рекорд тогтоолоо. Тус компанийг үндэслэгч Стив Жобс одоогийн захирал Тим Күүкт компаниа хүлээлгэн өгснөөс хойш Аpple-ийн зах зээлийн үнэлгээ хоёр дахин өсөөд байгаа нь энэ юм. Ийнхүү өндөр амжилтад хүрэхэд жил бүр шинээр гарч буй iPhone утасны загвар,  ялангуяа өнгөрсөн есдүгээр сард худалдаанд гарсан iPhone 6 болон 6 Plus утасны өндөр эрэлт ихээхэн нөлөөлжээ. Тухайлбал, iPhone-ийн хоёр шинэ загвар маш өндөр борлуулалттай байж, нээлтээ хийсэн эхний долоо хоногтоо 10 сая хувь борлогдсон нь компанийн хувьцааг 21 хувиар өсөхөд хүргэсэн юм. iPhone-ийн шинэ загваруудын борлуулалт энэ оны сүүлчийн улиралд ч сайн байх төлөвтэй байна. Зах зээл судлаачид 71,5 сая iPhone худалдаж амжина гэсэн төсөөлөл гаргажээ.
Хэрэв Apple-ийг нэг улс хэмээн төсөөлвөл ДНБ нь 745 тэрбум ам.доллараар хэмжигдэх Саудын Арабын араас бичигдэх, 650 тэрбум ам.долларын ДНБ-тэй Швейцариас баян орон байх байжээ.