Бээжин хотын бэлэн хувцасны тийм ч том биш нэг дэлгүүр гаднаа “Албан тушаалтнаас бусад хятад иргэд орохыг хориглоно” гэсэн бичиг наасан нь үйлчлүүлэгчдийн бухимдлыг хүргэсэн байна.

Beijing Youth Daily сонинд бичсэнээр бол дэлгүүрийн нэгэн ажилтан үүнийгээ худалдан авагчдын зохисгүй байдалтай холбон тайлбарлажээ.

Тэрээр “Манай дэлгүүр ихэвчлэн гадаадын иргэдэд үйлчилдэг. Нутгийн иргэд болохоор зөндөө асуудалтай. Тэд хувцасыг хэдэн цагаар үзэж, өмсч үздэг ч худалдаж авдаггүй. Зарим нь бүр манай үйлчлүүлэгчдийн мөнгө, түрийвчийг хулгайлдаг, үүнийг нь бид л төлөх болдог” гэсэн байна.

Иргэд үүнийг нь арьс өнгөөр ялгаварлах үзлийн нэг хэлбэр хэмээн интернетээр бөөн дуулаин дэгдээн шүүмжилж байна.
Зарим нь бүр энэ дэлгүүрийг хаах хэрэгтэй гэсэн шаардлага тавьж байгаа ч хуульч Ли Сианьдонгийн хэлснээр бол арьсны үзлээр ялгаварласан тохиолдолд хүлээлгэх хуулийн тогтолцоо хятадад байдаггүй гэнэ.