Америкийн Миссури мужийн Сент-Луис  хотын 26 настай Бекка Кемпбелл гэдэг эмэгтэй  өөрийгөө хамгаалахаар гар буу худалдан авчээ. Тус мужийн, сент-Луисээс холгүй орших  Фергюсен хотноо өнгөт арьст залууг цагдаагийн ажилтан буудан хөнөөсний дараа тэрээр ер нь янз бүрийн аймшигт хэрэг, эмх замбараагүй явдал  гарах боллоо, өөрийгөө хамгаалах гар буу худалдан авъя гэж шийдсэн гэнэ.
Тэрээр өөрийн 33 настай найз залуутай хамт явж буу худалдан аваад буцаж явахдаа машин барьж явсан залуу руугаа тоглоом хийж “”Фергюсинд ч бэлэн боллоо доо” хэмээн буу чиглүүлжээ.
Залуу нь гар буунд толгойгоо цохиулчихгүйн тулд гараараа зайлуулах үедээ удирдлага алдан дэргэдүүрээ явсан машиныг мөргөчихсөн байна.
Яг энэ үеэр бүсгүй гараа огцом хөдөлгөхдөө өөрийнхөө толгой руу буудчихжээ. Залуу нь түргэн тусламж дуудсан ч эмч нар бүсгүйг аварч чадаагүй гэнэ. Цагдаагийнхан залуугийн ярьсан үнэн эсэхийг мөрдөн шалгаж эхэлжээ. Юутай ч өөрийгөө хамгаална хэмээн авсан буу нь өөрийнх нь аминд хүрсэн ийм эмгэнэлт хэрэг гарсан байна.