Туулайн анчин хэмээн сошиал ертөнцөөр баахан баалуулсан УИХ-ын гишүүн Л.Эрдэнэчимэг өнөөдөр Төрийн ордонд "ан"-гийнхаа талаар тайлбар хийлээ. Тэрээр өнгөрсөн 7 хоногт Баян-Өлгий аймагт томилолтоор ажиллаж байхдаа туулай агнасан мэтээр авахуулсан зураг нь сошиалаар тарж, хэвлэл мэдээллийн хэрэгслээр түүн рүү дайрсанд юутай ч тайлбар хийлээ.

Тэрээр тайлбарлахдаа, “Баян-Өлгий аймагт томилолтоор ажиллахад амралтын өдөр таарсан тул казах малчин айлд зочилсон. Аймгийнхан ирсэн зочдоо казах уламжлалаараа дайлж, цайлах ёс заншлаа танилцуулан малчин айлд урьж, мөн бүргэдээ анд сургах ёс заншлаа танилцуулж хүндэтгэн хүлээн авдаг. Энэ л уламжлалаар туулайны чихмэл ашиглан бүргэдийг анд сургаж байгаагаа үзүүлсэн. Миний бүргэд, туулайн чихмэл барьж авахуулсан зургийг аймгийн ажилтан нийтийн сүлжээнд тавьсныг татаж аваад Л.Эрдэнэчимэг гишүүн туулай агнав хэмээн гуйвуулснаар олон нийтийн дургүйцлийг төрүүлжээ. Санаатайгаар гишүүний нэр хүндийг унагаах ажиллагаа явуулж байгаад харамсаж байна. Казах ард түмний ёс заншилтай танилцаж, дэлхийд ганц бүргэдийн ан хийх уламжлалыг үзэхээр гадаад, дотоодын олон зуун жуулчид Баян-Өлгий аймгийг зорьдог болсон. Энэ нь аймгийн хөгжлийг нэмэгдүүлж, аялал жуулчлал хөгжиж байгааг дэмжиж байгаагийн зэрэгцээ дотоодын аялал жуулчлалаар аялахыг уриалж байна“ гэсэн юм.
Юутай ч байс хийгээд л сошиал ертөнцөд эвгүй байдалд ордог эрхэм хатагтай энэ удаад тайлбар хийхээс өөр аргагүй байсан бололтой.