АНУ-ын Нью-Йорк хотын Бруклин дүүргийн 24 настай эр Кевин Харгроувыг их хэмжээний живх хулгайлсан хэрэгт буруутган браивчилжээ. Хууль сахиулагчид түүний  учруулсан хохирлыг яг дүнгээр нь хэлэхгүй байгаа ч лавтай хэдэн мянган доллараар хэмжигдэх бололтой.  
Тэр залуу супермаркет, худалдааны төвд орж очоод шинэ барааны үнийн кодыг өөрчилж нэгээс нөгөөд нь авч наагаад хамаагүй хямд үнэ төлөөд л гардаг байна. Кассын ажилтан ч анзаардаггүй электрон уншигч дээр гарсан мөнгийг л хураан авдаг байжээ. Нэг удаа бүр 99,36 ам.долларын үнэтэй боодол живхийг ердөө 1,06 доллараар авч байсан гэж Харгроув цагдаагийнханд мэдүүлсэн байна. Тэрээр өөрийн бага насны хүүхэддээ зориулж янз бүрийн фирмийн үйлдвэрлэсэн живх аваад илүү гарсныг нь гудамжинд худалддаг байжээ. Тэр барааны үнийн код солих энэ луйвраа Stop & Shop сүлжээ дэлгүүрүүдэд ихэвчлэн үйлддэг байсан байна. “Нью-Йорк, Нью-Жерси болон Коннектикутэд “Stop & Shop-ийн сүлжээ дэлгүүр шиг ийм хайнга газар өөр байхгүй. Би ийм ажлыг хэдийнээс эхлэн хийж байна. Чухам хэзээ эхэлснээ ч санахгүй байна” гэж тэр цагдаагийнханд гайхуулан ярьжээ.
Нью-Йоркийн прокурорын газар зөвхөн энэ оны нэгдүгээр сараас хойш гэхэд л тэр залуу  ийм луйвраа лавтай 100 гаруй удаа хийсэн гэж нотолжээ.
Stop & Shop сүлжээ дэлгүүрийнхэн мөрдөн байцаагчидтай хамтран ажиллаж сүүлийн хэдэн жилд Харгроувын луйврын балгаар алдсан живхнийхээ тоог  гаргахад тусална гэж мэдэгдсэн байна.