А.Сүхбат аваргын “100 асуулт 100 хариулт” нэвтрүүлэгт оролцохдоо ярьсан яриаг нь нэг эрхэм фэйсбүүк хуудаснаа бусдад нэгийг бодуулаасай хэмээн буулгажээ. “100 ч төгрөггүй байх үе надад хэд хэд гарч байсан. Нэг удаа гэр бүл маань огт мөнгөгүй болчихоод, идэх ч юм байгаагүй. Гэтэл би улсын начин цолтой, хүн харахад нэг л том бөх яваад байдаг. "Хүүхдээ яах вэ, өлсч байна" гэж Баясаа надад хэлсэн. Тэр өдөр барилдаантай байсан юм. Спортын төв ордон руу явах 100 төгрөг ч байдаггүй. Тэгсэн манай хүн "Бурханы өмнө 100 төгрөг байгаа" гэлээ. Би мөргөөд, гуйгаад нөгөө 100 төгрөгийг аваад гарсан. Очоод тэр барилдаанд олон хүнд барилдаан хийсэн. Хамгийн гол нь "Охин чинь өлсч байна" гэсэн үг, охины минь нүд өмнө харагдаад ямар ч байсан би сайн барилдах ёстой гэж бодоод зүтгэсэн. Тэгээд би тэр барилдаанд Б.Бат-Эрдэнэ аваргатай үзүүр түрүүнд үлдээд 250 мянган төгрөгийн бай шагнал авлаа. Автобусны ч мөнгөгүй байсан хүн чинь орой нь гурван тор идэх юм бариад, гэр рүүгээ таксидаж харьж билээ. Тэгж хүнд хэцүү үеийг давж туулж гарсан минь эргээд бодоход их үнэ цэнэтэй санагддаг даа” гэжээ.