“Би тэшүүрчин гэж хэлээд хил нэвтэрсэн, гэхдээ би амьдралдаа хэзээ ч хөлдөө тэшүүр өмсч үзээгүй” гэж Норвегид 15 настайдаа ирсэн  19 настай эмэгтэй ярилаа.
Энэчлэн мэргэжлийн тэшүүрчин гэдэг нэрийн дор монголоос залуучууд хил нэвтэрдэг байсан гэмт хэргийн сүлжээг Норвегид илрүүлэн шалгаж байна хэмээн норвегийн Dagbladet сонин бичээд дөрвөн жилийн өмнө тус улсад очиж амьдарсан дээрх бүсгүйн яриаг нийтэлжээ.
Монголын ийм залуучууд Европын орнууд руу визтэй хүмүүсийн далбаан дор ийм маягаар нэвтэрдэг байна. Харамсалтай нь тэд хэзээ ч ямар нэг тэмцээн уралдаанд оролцдоггүй, харин Норвегид хөдөлмөр эрхэлж зарим нь бүр хүчирхийллийн золиос болдог байна.
Визийн гэмт хэргийн энэ сүлжээ Бээжинд 2012 онд сууж байсан Италийн Элчин сайдын яамны консулын хэлтсийн спортын тусгай визийг ашигладаг байна. Ийм визийг Шенгений хэлэлцээрт багтдаг европын орнуудад нэвтэрх залуу тамирчдад чөлөөтай олгодог байсан юм байна хэмээн ТАСС агентлаг мэдээллээ.