Бангладешийн жаал хүү Байезид Хоссейн ердөө дөрвөн настай ч яг л өвгөн шиг харагдана. Хүмүүс түүнийг Брэд Питтийн тоглосон “Бенжамин” киноны гол дүр гэцгээдэг байна.
Хөгшин настай хүн эхээс төрөөд, цаг хугацаа өнгөрөх тутам залууждагийг уншигч та санаж байгаа биз дээ. Ийм ч болохоор жаал хүүг хүмүүс бас цаашдаа залуужих байх гэж итгэдэг гэнэ.

Жаал хүүд хөгшрөлийн бүхий л шинж илэрч,  нүүр нь үрчгэр, арьс  нь  ч хуурайшин гуужиж, шээс нь гарах гарахгүй гээд л.....Шүд нь гэхэд л маш сул, ганхсаар унадаг байна.
Гадаад төрхөөсөө болоод тэрээр үеийнхэнтэйгээ,  хүүхдүүдтэй бараг тоглохгүй.

Түүний ээж Трипти Катун жаал хүүг 14-хөн настайдаа гаргасан юм байна. “Тэр гурван нас хүрч байж арай гэж  явж сурсан. Гурван сартайдаа амаараа дүүрэн шүдтэй байсан юм. Хүмүүстэй зүгээр л ярьж хөөрдөг ч гадаад төрхөөрөө ч ер байгаа байдал нь ч яг л настай хүн шиг аягладаг” гэж ээж нь ярьжээ.

“Өвгөн” жаал хүүгийн өсөлт хөгжлийн энэ байдал Бангладешийн эмч нарын гайхшралыг төрүүлж, урьд нь ийм тохиолдолтой таарч байгаагүй болохоор хэрхэн яаж туслахаа мэдэхгүй байгаа гэнэ.