Америкийн Миссисипи мужийн Рэнкин тойрогт өнгөрсөн арван хоёрдугаар сарын 25-ны Христийн мэндэлсний баяраар эхнэр нөхөр хоёр эзгүй явж байгаад гэртээ иртэл гадаа нь хэнийх нь мэдэхгүй улаан өнгийн Chevrolet машин байх юм гэнэ. Гайхаад дөхөж очтол өөрийн нь гэрээс үл таних эрэгтэй эмэгтэй хоёр гарч ирээд өнөөх машинд суун давхиж одсон байна.

Цагдаа дуудахад ирээд үзвэл танихгүй хүмүүс гэрээс нь үнэт болон эд зүйл хулгайлаагүй ч баярт бэлтгэсэн зүйлсийг нь хөргөгчөөс нь авч идээд хоосолж, тамхи татан, буйдан дээр нь тухалж байсан мөрөө үлдээжээ.

Цагдаагийнхан машинаар нь  сураглаж гэмт этгээдүүдийг асар холдоогүй байхад нь баривчилсан байна. Гэмт этгээдүүд нь Хаттисбург хотын Стивен, Виктория Валентайн гэгч байжээ. Эрэгтэйгээс нь  бас  гурван грамм метамфетамин олдсон гэнэ.