Италийн хэвлэлүүдэд бичсэнээс үзвэл 16 сартай хүүхдээ машинд мартсанаас болж амийг нь эрсдүүлсэн эмэгтэйг Тосканы хууль сахиулагчид шалгаж эхэлсэн байна.

Энэ сарын 7-нд Тоскан мужийн Кастельфранко-ди-Сопра хотын нэгэн зөвлөлийн албан хаагч эмэгтэй өглөө хүүхдээ яслид хүргэж өгөөд ажилдаа явахаар гарсан боловч ясли руу явсангүй шууд ажилдаа очжээ. Тэгээд машинаа ажлынхаа гаднах талбайд зогсоогоод шууд ажилдаа орсон байна.

Ой дөнгөж өнгөрч яваа охин 30 градусын халуунд машин дотор өдрийн тал илүүг өнгөрөөж, зургаан цаг өнгөрсний дараа эмэгтэй гэнэт хүүхдээ санаад гарч ирэхэд охин ухаангүй байж. Тэр дор нь аврах алба, түргэн тусламж дуудсан ч тэд охины амийг аварч чадсангүй зүрх нь зогсчээ.

Хууль сахиулагчид нөхцөл байдлыг шалгаж эхлэхэд эмэгтэйн ажлынхан болон хөршүүд нь түүнийг их л халамжтай, хүүхэддээ их анхаарал тавьдаг эмэгтэй гэцгээсэн байна.