БОАЖ-ын сайд Н.Уртнасан өнөөдөр Байгаль орчны салбарт тусгай хамгаалалттай газрын сүлжээг өргөжүүлэх, биологийн төрөл зүйлийг хамгаалах, уур амьсгалын өөрчлөлтөд дасан зохицох, байгаль орчны сайн засаглалыг бэхжүүлэх зэрэг чиглэлээр сүүлийн 20 гаруй жил үр дүнтэй хамтран ажиллаж ирсэн НҮБ-ийн Хөгжлийн хөтөлбөрийн Суурин төлөөлөгч Илейн Конкеивичийг хүлээн авч уулзлаа.

Уулзалтаар байгаль орчны салбараас гадна аялал жуулчлалын салбарын хамтын ажиллагааг өргөжүүлэх, үйл ажиллагааны чиглэлийн ерөнхий төлөв байдлыг тодорхойлох, мөн тун удахгүй хэрэгжиж эхлэх уур амьсгалын өөрчлөлтийг сааруулах төслийн талаар мэдээлэл солилцож, ярилцлаа.Өнөөдрийн байдлаар БОАЖЯ, НҮБ-ын Хөгжлийн хөтөлбөр хамтран Монгол орны унаган байгалийг хамгаалах, уур амьсгалын өөрчлөлт, биологийн олон янз байдлын чиглэлээр 3 төслийг хамтран хэрэгжүүлэн ажиллаж байгаа бөгөөд  үр дүнтэй төсөл хөтөлбөрүүдийг хэрэгжүүлж байна.

Уулзалтын үеэр БОАЖ-ын сайд Н.Уртнасан Уур амьсгалын өөрчлөлтийн асуудал зөвхөн манай орны төдийгүй дэлхийн тулгамдсан нэн тэргүүний асуудал болоод байгааг онцолж “Монголын орон нутгийн ард иргэдийн уур амьсгалын өөрчлөлтөд дасан зохицох чадварыг нэмэгдүүлэх, эрсдэлийн менежментийг сайжруулах” төслийг хамтран хэрэгжүүлж, үр дүнтэй ажиллана гэж найдаж байгаагаа илэрхийлсэн юм.

Дээрх төслийг хэрэгжүүлснээр уур амьсгалын өөрчлөлтөд эмзэг өртөмтгий салбаруудыг дэмжих, дунд болон урт хугацааны төлөвлөлт уур амьсгалын өөрчлөлтийн мэдээлэлд суурилсан чадавхийг хөдөө аж ахуйн салбарын эдийн засгийн хөгжлийн зорилтуудтай уялдуулж бэхжүүлэх юм.

Түүнчлэн талууд аялал жуулчлалын салбарт шинэ хамтын ажиллагааг эхлүүлэх боломж, нөхцөлийн талаар харилцан санал солилцлоо. НҮБ-ын  Хөгжлийн хөтөлбөрийн Суурин төлөөлөгч Илейн Конкеивич Аялал жуулчлалын чиглэлээр хамтран ажиллах, Монгол орны үзэсгэлэнт байгаль, өв соёлд тулгуурлан жуулчдын урсгалыг нэмэгдүүлэх, цар тахлын байдал тайширсны дараа салбарыг сэргээх чиглэлд НҮБ-ын Хөгжлийн хөтөлбөр дэмжлэг үзүүлэн ажиллах боломжтой гэдгийг онцоллоо.