Байгаль орчин, аялал жуулчлалын яам, Монголын Үндэсний Худалдаа Аж Үйлдвэрийн танхим, Монголын аялал жуулчлалын холбоо хамтран “Tourism Forum Mongolia 2021” арга хэмжээг “Шинэ хэвийн байдал-Аялал жуулчлалыг сэргээх стратеги’’ уриан дор зохион байгууллаа.
БОАЖ-ын сайд Н.Уртнасан форумыг нээж хэлсэн үгэндээ Цар тахлын улмаас өнгөрсөн хоёр жилийн хугацаанд аялал жуулчлалын салбар бүхэлдээ зогсонги байдалд орсон. Энэ салбарт 1600 гаруй аж ахуйн нэгж, 88 мянган ажлын байр эрсдэлд орж, улсын төсөвт гурван их наяд төгрөгийн алдагдал учирсныг онцолсон бол МҮХАҮТ-ын Ерөнхийлөгч О.Амартүвшин “Бид олон жил аялал жуулчлалын салбарт болохгүй байгаа зүйлсийг ярьж ирсэн. Өнөөдөр зөвхөн яриад суух биш яаж засаж, өөрчлөх, цар тахлын дараах шинэ хэвийн байдалд хэрхэн сэргээх, дасан зохицох талаар нэгдмэл стратегиа энэ форумаар боловсруулна” гэсэн юм. Монголын аялал жуулчлалын холбооны ерөнхийлөгч Д.Гантөмөр "Вакцинжуулалтын нөлөөгөөр дэлхийн аялал жуулчлалын салбар урагшлах араандаа орсон тул цаашид тэг зогсолт хийсэн салбараа хэрхэн аврах вэ гэдэг нь чухал" хэмээн тодотгов. Мөн нээлтийн үеэр Дэлхийн Аялал жуулчлалын байгууллагын Ерөнхий нарийн бичгийн дарга Зураб Пололикашвили цахимаар мэндчилгээ дэвшүүллээ.
“Аялал жуулчлалын маркетингийн чиг хандлага, бүтээлч арга хэлбэрүүд” илтгэлийг МҮХАҮТ-ын Аялал жуулчлалын зөвлөлийн дарга Б.Барсболд, “Жуулчин тээврийн өнөөгийн байдал, шийдвэрлэх гол асуудлууд” илтгэлийг ЗТХЯ-ны Төрийн нарийн бичгийн дарга С.Батболд, “Ковидын үеийн зочлох үйлчилгээний олон улсын арга туршлага” илтгэлийг Аялал жуулчлалын хөгжлийн төвийн захирал С.Бат-Эрдэнэ танилцууллаа. Форумын хүрээнд “Ковидын үеийн болон дараах маркетинг, гадаад сурталчилгаа”, “Жуулчин тээвэрлэлтийн боломж ба шийдвэрлэх асуудлууд”, “Зочлох үйлчилгээний чиг хандлага, стандарт” гэсэн үндсэн гурван сэдвийн хүрээнд хэлэлцүүлэг өрнүүлэв.
Шийдвэр гаргагчид, аялал жуулчлалын салбарын бүх оролцогчид 2022-2023 онд аялал жуулчлалын салбарыг хамгийн хурдан хугацаанд сэргээх зайлшгүй шаардлагатай байгаа тухай нэгдсэн ойлголтод хүрч, үүсээд буй нөхцөл байдалд үнэлэлт, дүгнэлт өглөө. Мөн ирээдүйн чиг хандлагад нийцсэн аялал жуулчлалын салбарыг сэргээх нэгдсэн төлөвлөгөө боловсруулах, гарц шийдлийг тодорхойлох, Аялал жуулчлалын салбарыг сэргээх хөтөлбөр боловсруулах ажлын хэсгийг байгууллаа.
