УИХ-ын гишүүний халдашгүй байдлын дэд хорооны хуралдаан үргэлжилж, Г.Амартүвшин гишүүний асуудлыг хэлэлцэж байна. Хуралдаанд гишүүдийг нэрсийн дарааллаар нэг нэгээр нь оруулж байгаа бөгөөд хамгийн эхэнд Н.Алтанхуяг гишүүн орсон бол түүний дараа Г.Амартүвшин гишүүн орж байна. Түүнийг Хөгжлийн банкны захирлаар ажиллаж байхдаа зарим аж ахуйн нэгжид давуу байдал олгож, улсад 33 тэрбум төгрөгийн хохирол учруулсан гэж үзэн яллагдагчаар татжээ.

УИХ-ын гишүүн Г.Амартүвшин "Намайг шалгаж байгаа үндэслэл нь "Вертэкс майнинг" гэдэг компанид давуу байдал олгосон, улсад онц их хэмжээний буюу 33 тэрбум төгрөгийн хохирол учруулсан гэж үзэж байгаа юм байна. Гэтэл тэр 33 тэрбумын зээл нь өнөөдөр 16 тэрбумын үлдэгдэлтэй, 9.6 тэрбум төгрөгийн зээлийн хүү төлсөн байна. Дээрээс нь анх тавьсан барьцаа хөрөнгө нь хэвээр байгаа. Тэгэхээр яг яаж хохирол учруулсан нь тодорхой биш байна. Дээрээс нь Хөгжлийн Банкны тухайд гүйцэтгэх захирал нь дангаараа ямар нэгэн зээлийн шийдвэр гаргадаггүй. Нийт 16-17 хүн шийдвэр гаргалтад оролцдог. Мөн ТУЗ-ийн шийдвэр гарсан тохиолдолд гүйцэтгэх захирал биелүүлэх үүрэгтэй" хэмээн ярьлаа.