Гаалийн ерөнхий газраас сүүлийн үед илрүүлсэн томоохон хэрэг, зөрчил, албан хаагчдын сахилга хариуцлагад авсан арга хэмжээ, гаалийн цахимжилтын хүрээнд хийж хэрэгжүүлж буй үйл ажиллагааны талаар мэдээлж байна.
Энэ үеэр шатахууны нийлүүлэлтийн талаар мэдээлэл өглөө. Тодруулбал, энэ сарын 1-12-ны хооронд 66,3 мянган тонн түлш шатахуун оруулж ирсний 92 хувь нь Сүхбаатар боомтоор буюу ОХУ-аас импортолжээ.
Импортын шатахууны урсгалыг тасалдуулахгүй байх үүднээс хялбаршуулсан шуурхай горимоор хяналт бүрдүүлэлтийг хийж байгаа гэв. Ингэхдээ гаалийн лабораторын шалгалтыг хийхгүй шууд оруулж ирж байгаа ч, дараа нь буюу агуулах саванд хийсний дараа чанарын шалгалт хийж байна гэлээ.
Мөн хилээр шатахуун импортолж буй ААН-үүд нь бүтээгдэхүүний юүлэлт, шилжүүлэн ачилтын зөвшөөрлийг шууд олгож байгаа гэв.
ЧИХРИЙН ШИЖИНГИЙН ТАРИАГ ХУУЛЬ БУСААР НЭВТРҮҮЛЭХИЙГ ЗАВДАХ НЬ ИХЭСЖЭЭ
Сүүлд гарсан нийт зөрчлийн 22 хувь буюу улсын хилээр нэвтрүүлэхийг хориглосон бараа, бүтээгдэхүүн эзэлжээ. Тэр дундаа мансууруулах бодис болон сэтгэцэд нөлөөлөх бодис маш ихээр илэрч байна. Он гарсаар 7-р сар хүртэл 14 удаагийн завдсан үйлдлийг илрүүлж цагдаагийн байгууллагад шилжүүлжээ. Сүүлийн үед иргэд гадаадаас, чихрийн шижингийн үед хэрэглэдэг, тураадаг гэх зориулалттай тарилгыг арилжааны зориулалтаар оруулж ирэхийг завдах нь ихэсжээ. Он гарсаар 40 удаагийн тохиолдол бүртгэгдсэн буюу 1300 орчим тарилгыг хураан авч, саатуулж, хуулийн байгууллагад шилжүүлжээ. Тиймээс эрүүл мэндийн байгууллага, мэргэжлийн эмчийн заавар зөвлөмжөөр хэрэглэдэг эм, эмийн хэрэгсэл, тарилгыг бусдын гар дээрээс, цахимаас худалдан авч өөрсдийн эрүүл мэндэд хохирол учруулахгүй байхыг анхаарууллаа.
НИЙТ 2300 ЗӨРЧИЛ ИЛЭРСНИЙ ТАЛ ХУВЬ НЬ ТАТВАРААС ЗАЙЛСХИЙХ ҮЙЛДЭЛ БАЙНА
Он гарсаар буюу долоодугаар сарын байдлаар гаалийн 2300 зөрчил илэрсэн нь өнгөрсөн жилээс 18 хувиар өссөн үзүүлэлт байжээ. Тэр дотроо 53 зөрчил нь гэмт хэргийн шинжтэй байгаа бол гаалийн болон бусад татвараас зайлсхийх зөрчил 50 хувийг эзэлж байна.
Мөн нийт зөрчлийн 23 хувь нь хориглосон буюу хязгаарласан бараа бүтээгдэхүүнийг хууль бусаар нэвтрүүлэхийг завдсан үйлдлүүд эзэлж байна гэдгийг ГЕГ-ийн Олон нийттэй харилцах төвийн дарга Б.Мөнх-Амар мэдээллээ.
2028 ОН ГЭХЭД ГААЛИЙН БАЙГУУЛЛАГЫН БҮХ ҮЙЛЧИЛГЭЭ ЦАХИМЖИНА
ГЕГ-ын тоног төхөөрөмж, мэдээллийн технологийн төвийн ахлах байцаагч н.Мөнхзул мэдээлэл өгсөн ба гаалийн цахим үйлчилгээний gaali.mn сайтад аргэн 12 үйлчилгээ, хуулийн байгууллага ААН 33 төрлийн үйлчилгээг цахимаар авах боломжтой болжээ. Тэр дундаа гаалийн бүрдүүлэлт хийхэд өмнөхөөс илүү хялбар болсон гэлээ. Татварын тоо хэмжээ, жагсаалтыг харах, гаалийн мэдүүлгийн явцтай танилцах, өмнөх дугаарлалтын дарааллаа харах, статистикийн мэдээлэл, барааны ангилал тус бүрд ямар бичиг баримт шаарддаг гэх зэрэг бүхий л мэдээллийг багтаасан гэлээ. Мөн цаашлаад цахим үйлчилгээг хиймэл оюун ухаанд суурилсан хөтөчтэй байхаар төлөвлөжээ.
Энэ нь 2028 онд хэрэгжиж дуусахад дээр дурдагдсан үйл явцаас гадна улсын хилээр нэвтэрч буй зорчигчдод хүрч иж бүрэн үйлчлэх цогц төсөл аж.
