БНХАУ-ын дарга Ши Жиньпин, ОХУ-ын Ерөнхийлөгч Владимир Путин нар Узбекистаны Самарканд хотноо болж байгаа Шанхайн хамтын ажиллагааны байгууллагын дээд хэмжээний уулзалтын үеэр хоёр талт уулзалт хийлээ.
Украины дайнд БНХАУ тэнцвэртэй байр суурь хадгалж байгааг нь өндрөөр үнэлж байгаагаа Владимир Путин энэ үеэр илэрхийлжээ.
Мөн тэрээр АНУ Тайванийн асуудалд хөндлөнгөөс өдөөн хатгалга явуулж байна хэмээн үзэж, энэ асуудалд ОХУ БНХАУ-ыг дэмжихээ мэдэгдсэн байна.
Харин БНХАУ-ын дарга Ши Жиньпин Владимир Путиныг эртний анд хэмээн нэрлэж ОХУ-тай хүчирхэг гүрнүүдийн хувиар дэлхийд тогтвортой байдал бий болгохын тулд хамтран ажиллахад бэлэн байгаагаа илэрхийллээ.
Ши Жиньпиний хувьд энэ удаагийн айлчлал нь цар тахал дэгдсэнээс хойш сүүлийн хоёр жилийн хугацаанд хилийн чанадад хийж буй анхны айлчлал нь юм.
Хоёр хөршийн төрийн тэргүүнүүд энэ оны хоёрдугаар сард Бээжингийн өвлийн олимпийн үеэр хамгийн сүүлд уулзалдах үедээ хоёр улсын нөхөрлөлд хязгаар үгүй хэмээн хамтарсан мэдэгдэлдээ хэлж байсан юм.
