Цахим хөгжил, харилцаа холбооны яам, Цагдаагийн ерөнхий газар, Монголбанк, Монголын банкны холбооноос хамтран цахим залилах гэмт хэргийн нөхцөл байдлын талаар мэдээллээ. Энэ үеэр цахим хэрэгсэл ашигласан залилах гэмт хэргээс урьдчилан сэргийлэх "Unsend-Бүү шилжүүл" аян эхлүүлж буйгаа мэдэгдэв.

Улсын хэмжээнд 2022 оны арван сарын байдлаар нийт 31 мянга орчим гэмт хэрэг үйлдэгдсэнээс 32.8 хувь буюу 10 мянгыг нь цахимаар залилах гэмт хэрэг эзэлж байгаа аж. Энэ нь өмнөх оны мөн үетэй харьцуулахад 97.3 хувиар өссөн үзүүлэлт юм байна.

Монгол Улсад интернэт хэрэглэгчийн тоо 3.2 саяд, фэйсбүүк хэрэглэгчийн тоо 2.8 саяд хүрчээ. Цахим хэрэглээ өссөнтэй холбоотойгоор цахим гэмт хэрэг өсч байна гэж цагдаагийн байгууллагаас мэдээлэв.

Оны эхний арван сарын байдлаар 818.7 тэрбум төгрөгийн хохирол учирчээ. Үүнээс 799.3 тэрбум төгрөгийн хохирлыг нөхөн төлүүлж ажилласан байна. Энэ төрлийн гэмт хэргийн хохирогч болохгүй байх, ард иргэдээ сэрэмжлүүлэх үүднээс өнөөдөр (2022.11.14)-өөс эхлэн 14 хоногийн хугацаатай "Unsend-Бүү шилжүүл" аян эхлүүлж байгаагаа зарлалаа.

Цахимаар залилах төрлийн гэмт хэргийн хохирогчид 35-аас дээш насныхан байна. Гэмт этгээдүүд хөдөө орон нутагт энэ төрлийн гэмт хэргээ хийхээр төлөвлөж байгааг цагдаагийн байгууллагаас анхааруулав.

Хохирогчид гар утас дээр ирсэн тоо нууц үгээ бусдад шилжүүлсний улмаас фэйсбүүкээ алддаг, урьдчилгаа төлбөр шилжүүлэх байдлаар цахим гэмт хэргийн хохирогч болж буй аж. Тиймээс иргэддээ бүх мэдээллээ нууцалж, урьдчилгаа төлбөр хэлбэрээр мөнгө шилжүүлэх гэж байгаа бол сайтар нягтлах хэрэгтэйг анхааруулав.

Гэмт этгээдүүд хуурамч дуудлага хийж, "Банкнаас ярьж байна" гэхчилэн иргэний нууц үг, код, мэдээллийг авч байгаа аж.

Энэ төрлийн гэмт хэргийн хохирогчид нь ихэвчлэн 35-аас дээш насны иргэд байна.