УИХ-ын гишүүн С. Одонтуяа, Б.Пүрэвдорж нар " Хувийн хэвшлийг төр дэмжих" тухай асуудлаар мэдээлэл хийлээ. Мөн үеэр УИХ дахь АН-ын бүлгийн гишүүн Б.Пүрэвдорж "УИХ-ын гишүүн С.Одонтуяа болон миний бие ААН-үүдийг дэмжих Монгол Улсын Их хурлын тогтоолын төслийг өргөн барьж байна. Энэ тогтоолын төслийн үндсэн агуулга нь ААН-ийн удирдлагуудыг гадаадад явахад нь албан пассворд олгох тухай асуудал юм. Үүнд хамгийн шилдэг татвар төлсөн ААН-үүдийн удирдлагад нийт 500 пассворд олгох тухай асуудал юм. Сумын тамгын газрын дарга албан пассворд аваад гадаад явдаг. Тэнд очоод хийсэн бүтээсэн ажилгүй, хэл усгүй гайхаж байгаад ирдэг. Тиймээс Монгол Улсын хөгжилд хувь нэмэр оруулж байгаа бизнесийн байгууллагын удирдлагыг гадаад улсад чөлөөтэй зорчиход давуу тал бий болгох зорилгоор тогтоолын төсөл өргөн барилаа" гэв.

Харин УИХ дахь АН-ын бүлгийн гишүүн С.Одонтуяа "Ганц пассвордын асуудал мэт харагдаж байгаа ч энэ нь төр хувийн хэвшлээ дэмжихэд том түлхэц болно. Төр баялаг бүтээгчдээ бодитойгоор дэмжих учиртай. Шинэ бизнесийн санаа олоод ир, бид дэмжинэ гэсэн төрийн алхам болох юм. Төрийн алба хаагчид хулгайтайгаа тэмцээд, энд байж байх хэрэгтэй. Монгол Улсын бизнесийнхэн л хөгжүүлж байна. Тиймээс энэ хүмүүст гадаад явах боломжийг нь олгох хэрэгтэй. Маш олон бизнес эрхлэгчид гадагшаа явж чаддаггүй, виз хүлээдэг асуудал бий. Тиймээс хувийн хэвшлийнхнийг дэмжих хэрэгтэй. Төрийн алба хаагчид гадагшаа явснаар нэг доллар ч орж ирдэггүй. Харин бизнес эрхлэгчид гадаад явснаар валют оруулж ирэх боломжтой" гэлээ.