Засгийн газрын 2023 оны гуравдугаар сарын 22-ны өдрийн тогтоолоор байгуулагдсан Аж үйлдвэржилтийн Үндэсний хорооны анхны хуралдааныг өнгөрөгч 4 дүгээр сард зохион байгуулсан. Засгийн газраас хэрэгжүүлж буй Шинэ сэргэлтийн бодлогын хүрээнд Аж үйлдвэржилтийн сэргэлтийг эрчимжүүлэх зорилготой уг Үндэсний хороог Уул уурхай, хүнд үйлдвэрийн сайд Ж.Ганбаатар ахалж байна. Анхны хурлаар холбогдох байнгын хороодын дарга, сайд нар, салбарын төрийн болон хувийн хэвшлийн төлөөлөл, эрдэмтэн судлаачдын бүрэлдэхүүн 6 асуудлыг хэлэлцэж, 4 дэд хороотой байхаар тогтож, дэд хороодын удирдлагуудыг томилсон. Үндэсний хорооны гол зорилго нь аж үйлдвэрийн салбарт эхний ээлжид бодитоор хэрэгжихүйц цөөн тооны төслийг сонгож, нэмүү өртөг шингэсэн, эцсийн бүтээгдэхүүн үйлдвэрлэх ажлыг эрчимжүүлэх юм.
Монгол Улсад 2018-2022 онд 12.4 тэрбум ам.долларын гадаадын шууд хөрөнгө оруулалт хийгдсэний 9.1 тэрбум ам.доллар буюу 73.4 хувийг уул уурхайн салбарын хөрөнгө оруулалт эзэлж байна. Уул уурхайн салбарт хийгдсэн гадаадын шууд хөрөнгө оруулалтын 60 гаруй хувийг Оюутолгой төслийн хөрөнгө оруулалт эзэлжээ.
Аж үйлдвэржилтийн сэргэлтэд хөрөнгө оруулалтын эрх зүйн орчныг сайжруулах зайлшгүй шаардлага бий. Энэ зорилгын хүрээнд УУХҮЯ нь Эдийн засаг, хөгжлийн яам, Хууль зүй, дотоод хэргийн яамтай хамтарсан Ажлын хэсгийн хүрээнд Хөрөнгө оруулалтын тухай хуулийн шинэчилсэн найруулгын төслийг боловсруулаад байна. Хуулийн төслийг УИХ-ын энэ оны намрын чуулганаар хэлэлцүүлж батлуулахаар ажиллаж байна.
