Долоодугаар сарын 2-ны өдрийн байдлаар Хэнтий нурууны баруун хажуугаас усжих Туул /Улаанбаатар-Лүн/ Тэрэлж, зүүн хажуугийн Онон /Дадал/, Улз /Баян-Уул/, Хэрлэн /Өндөрхаан/ зэрэг голуудын усны түвшин өмнөх өдрийнхөөс 5-15 см нэмэгдсэн байна.
Туул /Улаанбаатар/, Хараа /Дархан/, Хэрлэн /Мөнгөнморьт-Өндөрхаан/, Балж, Онон, Улз зэрэг голууд үерийн түвшинг 5-40 см, Туул гол Лүн орчимд үерийн аюултай түвшинг 60 см даван үерлэж байна.
Мөн Алтай нуруунаас эх авсан Буянт гол үерийн түвшинг 15 см, Ховд гол үерийн аюултай түвшинг 10 см давсан байдалтай нэлээд элбэг устай байна.
Ойрын өдрүүдэд Алтай, Хангай, Хэнтийн уулархаг нутгаар түр зуурын бороо орох тул сав, гулдрил дүүрэн, үерийн байдалтай буй голуудын усны түвшин тухайн хугацаанд орсон хур борооны эрчимшил хэмжээнээс шалтгаалан богино хугацаанд огцом нэмэгдэх нөхцөл бүрдэх учир голуудын сав дагуух хот, суурин газрын ард иргэд, зусаж, суурьшиж буй малчид, аялж, амарч яваа ард иргэдийг үерийн аюулаас сэрэмжтэй байхыг онцгойлон анхааруулж байна.
