Зургийг: С.Батсайхан

Худалдан авагч тал авсан нүүрсээ татан авахгүй байгаагаас болж хил дээр 10 сая тонн нүүрсний овоолго үүсээд байна.Уул уурхайн биржийн арилжааны идэвх өмнөх онтой харьцуулахад эрс буураад буй энэ үед нүүрсний форвард гэрээг хоёрдогч зах зээл дээр дахин арилжаалах боломжтой болсныг Монголын Хөрөнгийн бирж мэдээллээ. Ингэснээр хөрвөх чадвар нэмэгдэж, биржийн арилжаа идэвхжиж, мөн худалдан авагч талд уян хатан нөхцөл бүрдсэнээр хил дээр үүссэн нүүрсний овоолгыг арилгах эерэг үр дагавартайг тодотгож байна.Түүнчлэн уул уурхайн бүтээгдэхүүний экспортыг нэмэгдүүлэх чиглэлээр зарим арга хэмжээ авч хэрэгжүүлэхийг Засгийн газрын хуралдаанаар Ерөнхий сайд үүрэг болголоо. Тухайлбал: хил дээрх нүүрсний овоолгын асуудлыг шийдвэрлэх, тээвэрлэлтийг оновчтой зохион байгуулах, Ханги-Мандал чиглэлийн төмөр замын холболтын бүтээн байгуулалтын ажлыг гүйцэтгэж, боомтын нэвтрүүлэх хүчин чадлыг нэмэгдүүлэх арга хэмжээ авахыг даалгав.Нүүрсний үнэ унасны улмаас худалдан авагч тал хагас жил орчмын өмнө өндөр үнээр авсан нүүрсээ татан авахгүй байгаагаас болж хил дээр 10 сая тонн нүүрсний овоолго үүсээд буйг Сангийн сайд мэдээлж байв.Уул уурхайн бүтээгдэхүүний олборлолтыг нэмэгдүүлэх замаар экспортын нэмэлт орлого бүрдүүлэх, гадаад валютын улсын нөөцийг нэмэгдүүлэхэд дэмжлэг үзүүлэх чиг үүрэг бүхий Ажлын хэсгийг өнгөрсөн долоо хоногийн Засгийн газрын хуралдаанаар Сангийн сайдаар ахлуулан байгуулсан юм.

Эх сурвалж: Блүүмбэрг